नातिनीको एल्बम सार्वजनिक गर्दै प्रचण्डले भने- मेरो ह्याट्रिक भयो
काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्डले नातिनी स्मीता दाहाल असाध्यै रुने बच्ची रहेको स्मरण गराएका छन् ।
स्मिताको तेस्रो एल्बम रागिनीको विमोचन कार्यक्रमका प्रमुख अतिथि प्रचण्डले स्मरण गरे, ‘म भुमिगत कालमा बुटवलमा हुँदा स्मीता ६ महिना जतिकी थिइन्, बुवाले लिएर भेट्न आउनुपर्ने त्यो तीन घन्टाको बाटोमा रोएर हैरान पारेकी थिइन् रे, धेरै रुनेको स्वर खुल्छ भनिन्थ्यो त्यसैले उनी गायिका हुने त्यो लक्षण थियो भन्ने लाग्छ अहिले ।’
स्मिताका तीन वटै एल्बमको विमोचन आफुले गरेको सम्झिँदै उनले भने, ‘मेरो ह्याट्रिक भयो ।’ लगन मिहेनतलाई निरन्तरता दिएर स्मिता अघि बढे उज्वल भविष्य रहेको बताएका प्रचण्डले नातिनीलाई सुझाव दिए, ‘साधनामा कमि नहोस् ।’
गीतकार यादव खरेल, संगीतकार दिपक जंगम, गायक दिप श्रेष्ठलगायतको उपस्थितिमा प्रचण्डले भने, ‘यस्ता दिग्गज व्यक्तित्वको अगाडी स्मिताको गायन अगाडी आएको छ, उनले आशिर्वाद लिन सक्नुपर्छ ।’ स्मिताको पहिलो एल्मब स्मिता, दोस्रो स्मिता-२ हुँदै तेस्रो रागिनी बजारमा आएको सन्दर्भमा प्रचण्डले भने, ‘साधना विना कुनै काम पनि पुरा हुँदैन, गायनका लागि वंशानुगत गुणपनि चाहिन्छ । म गीतको पारखी पनि हुँ । कतिपय कलाकारहरुको फ्यान अझै छु ।’
योगेन्द्रमणि दाहालको शव्द, केदार मास्केको संगीत रहेको एल्बमको एउटा गीतको म्युजिक भिडियो पनि प्रचण्डले हेरेका थिए । ‘मैले यो मञ्चबाट स्मितालाई आशिर्वाद दिनु भनेको नाटकीय लाग्न सक्छ, मेरो सँधैभरी उनलाई आशिर्वाद छँदै छ ।’, प्रचण्डले भने, ‘अझ राम्रोसँग अगाडी बढ्न सकुन् ।’
कार्यक्रममा स्मितालाई शुभकामना दिन हजुरआमा सीता दाहाल, आमा गंगा दाहाल, बाबु जीवन आचार्य, मामा प्रकाश दाहाल, माइजु विना मगरलगायतको उपस्थिति रहेको थियो ।
कार्यक्रममा संस्कृति तथा पर्यटनमन्त्री आनन्द पोखरेलको पनि उपस्थिति थियो ।
dainiknepal
