सिके राउतका दोस्रो तहका नेतालाई दश प्रश्न

कैलाश महतो, सह-संयोजक, स्वतन्त्र मधेस गठबन्धन
सीके राउतको स्वतन्त्र मधेस गठबन्धनका सहसंयोजक समेत रहेका कैलाश महतोले चितवनदेखि पश्चिमतिर आफ्ना गतिविधि चलाउँदै आएका छन् । तराईलाई नेपालबाट अलग देश बनाएर छुट्टै राष्ट्र बनाउने सपना बाँड्दै हिँडेका कैलाश सीके राउतका अत्यन्तै विश्वासिला र निकटका व्यक्ति हुन् । लुम्बिनीमा भएको विश्व सम्मेलनका क्रममा प्रदर्शनदेखि नवलपरासी, कपिलवस्तुलगायतका जिल्लामा आफ्ना गतिविधि चलाउँदै आएका छन् । हालै नवलवरासीमा पक्राउ परेर रिहा भएका कैलाशसँग दैनिकले नेपालले मेलबाट प्रश्न पठाइ लिएको अन्तर्वार्ता ।
१. तपाईहरूको अभियानको चौतर्फी विरोध किन भएको हो ?
– हाम्रो अभियानको मधेसमा कहीं कतै विरोध भएको छैन । विरोध गर्नेहरु गैर मधेसी मात्रै हुन्, जुन स्वाभाविक पनि हो । तपाईं मधेसमा मधेसी जनताको कुरा सुन्नुस, भावना बुझ्नुस् र स्वतन्त्र मधेस गठबन्धनको अभियानप्रति आकर्षित हुने कारण सोध्नुस् । प्रष्ट भइहाल्नुहुनेछ ।
२. तपाईहरूको अभियान त संविधान विरुद्ध छ नि ?
– हामीले हामीलाई संविधानले दिएको परिधिभित्र रहेरै अभियान चलाएका छौं । आफ्नै बलबुत्ता र करकाप समेतमा नेपालीले बनाएको संविधानको इज्जत त नेपाल सरकार र उसका प्रहरी प्रशासनले गरेका छैनन् । तपाईं नेपालको संविधानको धारा १३८ हेर्नुस् । त्यसलाई हामीले सम्मान गरेका छौं ।
३. तपाईहरूलाई देश बिखण्डनकारी भनिन्छ किन हो ?
– हामीलाई बिखण्डनकारी भन्नु नै नेपाली राज्यको बचपना हो । नेपाली राज्यले दुई शताब्दीसम्म पनि देशप्रेमी र बिखण्डनकारीको परिभाषा जान्न नसक्नु दुखद् कुरा हो । हामीले स्वतन्त्र मात्र हुन खोजेको हो । कसैको देश तोड्ने फोड्ने हाम्रो नियत र हैसियतभन्दा बाहिरका कुरा हुन् । हामी नेपाली उपनिवेशबाट मुक्त मात्र हुन खोजेका हौं । औपनिवेशिक शासनबाट मुक्ति पाउनु भनेको राष्ट्र पुनर्निमाणको गौरवपूर्ण काम हो जसमा नेपालले हामीलाई झन् सहयोग गर्नुपर्ने हो ।
४. के तपाईहरू बिखण्डनकारी हो ?
– मैले भन्दिसकें कि हामी बिखण्डनकारी हैनौं । हामी लोकतन्त्र र स्वतन्त्रताप्रेमी हौं । हामी आजाद हुन चाहन्छौं जुन मधेसीको जन्मसिद्ध अधिकार हो ।
५. सीके राउतको अभियानमा आर्थिक व्यवस्था कसरी गर्नु हुन्छ ?
– ठीक त्यसरी नै जसरी तपाईं आफ्नो संस्था चलाउन मेहनत गर्नुहुन्छ । हामी मधेसी जनताको मुक्तिको लागि स्वतन्त्र मधेसको अभियान चलाई रहँदा आवश्यक आर्थिक व्यवस्था मधेसी जनताले नै सुरूदेखि गर्दै आइरहेका छन् । हामी उहाँहरूप्रति आभार प्रकट गर्न चाहन्छौं ।
६. तपाईहरूले अदालतमा दिने बयान किन फरक–फरक हुन्छ ? हामी बिखण्डनकारी होइनौँ भनेर किन बयान दिने गर्नु हुन्छ ? डराएर हो ?
– कदापि डराएर होइन । डराएको भए जेल समेतमा जान हाम्रा नेता कार्यकर्ताहरु किन तत्पर हुन्थे ? तपाईंले हाम्रो बयानलाई ध्यानपूर्वक सन्नोस्, पढ्नोस् र अध्ययन गर्नोस्, प्रष्ट भइहाल्नुहुन्छ । हामीले हाम्रो बयानमा सधैं एउटै कुरा भनेका छौं कि हामी बिखण्डनकारी होइनौं, हामी आजादकारी हौं । हामीले नेपाली उपनिवेशबाट मुक्त हुन मात्र खोजेका छौं । हामीले लोकतान्त्रिक मूल्य, मान्यता र पद्धतिलाई प्रयोग गर्दै जनमत संग्रहको बाटोलाई प्रयोग गर्न नेपाल सरकार समेतलाई अनुरोध गर्दछौं । तानाशाही राजतन्त्रको पिल्लर रहेको पंचायती व्यवस्था समेतले विसं २०३६ मा जनमत संग्रह गर्दा यो लोकतान्त्रिक गणतन्त्रको वकालत गर्ने सरकारले जनमत संग्रह गराउन किन हच्केको ? हामीले अरुको देश फोड्ने कुरा नभई आफ्नो मधेसलाई स्वतन्त्र गर्न मात्रै खोजेका छौं । जुन हाम्रो छैन, त्यसमा आधिकारिक हुने हाम्रो कुरै छैन ।
७. तपाईहरूको उदेश्य कहिलेसम्म पूरा हुन्छ ?
– हामीले मधेसमा ८ देखि १२ वर्षसम्म संजीवनीको रुपमा जनजागरण अभियान चलाउने योजना थियो । तर अकल्पनीय रुपमा अर्कै परिणाम देखियो । मधेसी जनतामा यति छिट्टै स्वतन्त्र मधेसको कुरा ठाउँ लेला भन्ने हाम्रो सोंचको ठीक विपरीत देखियो । मधेसी जनताको हाम्रो अभियानप्रति रहेको रुझान र आकर्षण यस्तै रही रहने हो भने धेरै समय कुर्नु पर्दैन ।
९. अमेरिका र पश्चिमा राष्ट्रहरूले तपाईहरूलाई उचालेको आरोप छ नि ? हो ?
– यस्ता आरोपहरुलाई हामीले खण्डन गर्न समय बर्बाद गर्न चाहदैनौं । यी र यस्ता अर्थहीन आरोपहरु हरेक परिवर्तनका बेला राज्यले लगाउने उसको राज्यकीय धर्म हो । राणाले पंचहरुमाथि, पंचहरुले प्रजातन्त्रपेमीहरुमाथि, प्रजातान्त्रिक कहलिनेहरुले गणतन्त्र चाहनेहरुमाथि, संघीयता चाहनेहरुमाथि यही उग्र राष्ट्रवादीहरुले नलगाएका इतिहास त हाम्रै अगाडि छन् नि ।
अर्को कुरा, हामीलाई अमेरिका र पश्चिमा राष्ट्रहरुले उचालेका छन् भने नेपाली राज्य के हेरेर बसेको छ ? राज्यसँग भएका यत्रा गुप्तचर निकाय, राज्य संयन्त्र, खर्बौंको लगानी र यत्रा प्रहरी, सेना र अन्य बडेमानका विद्वान् नेताहरुले किन अहिलेसम्म पर्दाफास गर्न सकेका छैनन् ? किन अमेरिका र पश्चिमा राष्ट्र र त्यसका कुटनीतिक निकायसँग स्पष्टिकरण मागिएको छैन ? तर हामी चाहन्छौं कि हाम्रो मुद्दामा उनीहरुको पनि ध्यान जाओस् । हामी र हाम्रो अभियान गलत छ भने हामीलाई सल्लाह देओस् र यदि हामी र हाम्रो माग सही र जायज छन् भने उनीहरुले पनि हामीलाई सहयोग गरुन् । हामी उहाँहरुले प्रयोगमा ल्याउने र उहाँहरुद्वारा प्रतिपादित विश्वले अवलम्बन गरेको अन्तर्राष्ट्रिय मानव अधिकार संरक्षणका नीतिगत सहयोगको प्रतिक्षामा छौं ।
१०. तपाईहरूले गाउँका सिधासादा युवालाई भड्काएर देश टुक्राउने अभियानमा किन लगाउनु भएको हो ?
– तपाईलाई एउटा कुरा म के बताइदिऊँ भने हाम्रो स्वतन्त्र मधेसको अभियानमा प्रत्यक्ष रुपमा लाग्नेहरु नेपालको शिक्षा प्रणालीले उत्पादन गरेकै डाक्टर, इंजिनियर, प्रोफेसर, शिक्षक, वकिल, समाजसेवी, बुद्धिजीवी, युवा र विद्यार्थी छन् । अब तपाईं आफैं भन्नुस कि नेपाल सरकारले के र कस्ता सत्य कुराहरु पढाए, सिकाए र भोगाए कि हिजोसम्म नेपाली बन्ने र बन्न चाहने उनीहरु आज खुल्लम खल्ला रुपमा आफूले पढेका पढाईमाथि नै अविश्वास र शंका गर्न थालेका छन् ? हाम्रो अभियानमा लाग्ने ती जनशक्तिहरू तपाईंको नजरमा अझै पनि गाउँले, देहाती, अनपढ र केही नजान्नेहरु कसरी भए ?
तिनै प्रोफेसर, डाक्टर, इंजिनियर, शिक्षक, बद्धिजिवी र समाजसेवी लगायतकाहरु हिजोसम्म आ–आफ्ना पेशा र कार्यहरुमा दक्ष, र कार्यकै दौरान नयाँ चेतना र सत्यको खोजी गर्ने ती व्यक्तित्वहरुले आफ्नो भावी सन्ततिलाई दासता र गलामीमुक्त हुन सिकाउने उनीहरु तपाईंको परिभाषामा कहिलेसम्म केही नजान्ने अनपढ र गँवार र देहाती युवाहरू कहलिने ?
dainiknepal