२०७४ माघपछि प्रधानमन्त्रीको कुर्सी छाड्छुः ओली
२०७३ जेष्ठ २४ सोमबार
फोटो :काठमाडौं विश्वविद्यालयमा पुगेका प्रभानमन्त्री ओली । तस्बिर: श्रीराम केसी
बनेपाः प्रधानमन्त्री केपी शर्मा ओलीले २०७४ माघ पछिमात्र सरकार परिवर्तन हुने बताएका छन् ।
सोमबार काठमाडौं विश्वविद्यालयको ७२ औँ सिनेट बैठकमा सहभागी हुन धुलिखेल आएका प्रधानमन्त्री ओलीले पत्रकारसँग कुरा गर्दै २०७४ माघपछि मात्रै कुर्सी छाड्ने बताएका हुन् ।
‘सरकार परिवर्तन हुन्छ, तर २०७४ माघपछि मात्र, अहिले सरकार परिवर्तनका लागि मिति पुगिसकेको छैन’ उनले भने, ‘सरकार परिवर्तन त हुन्छ तर चुनाव गराएर मात्रै ।’
प्रधामन्त्री ओलीले स्थानीय र आमचुनाव चुनाव नभई सरकार परिवर्तन नहुने दोहोर्याए । काठमाडौं विश्वविद्यालयका कुलपतिसमेत रहेका प्रधानमन्त्री ओलीले आगामी आर्थिक वर्ष २०७३÷७४ को वार्षिक कार्यक्रम तथा बजेटसमेत पारित गरेका थिए ।
बैठकमा सहभागी सह–कुलपति एवम् शिक्षा मन्त्री गिरिराजमणि पोखरेलले विश्वविद्यालयको विकासमा आफूले सक्दो सहयोग गर्ने बताए । उपकुलपति प्रा.डा रामकण्ठ माकजु र रजिष्ट्रार प्रा. डा भोला थापाले केयुको आर्थिक प्रतिवेदन र भावी नीति तथा कार्यक्रमबारे प्रकाश पारेका थिए ।
बैठकले विश्वविद्यालयको शिक्षाको गुणस्तर उकास्ने, ग्राम बनाउने लगायत नौवटा एजेण्डा पास गरेको छ ।
बैठकले आगामी आर्थिक बर्ष २०७३÷७४ को वार्षिक कार्यक्रम तथा तीन अर्ब ३२ करोड ४६ लाख ७४ हजार रुपैयाँको बजेट पारित गरेको उपकुलपति प्रा.डा माकजुले बताए ।
annapurnapost
