पूर्वरानी रत्न शाह अस्पताल भर्ना, राजपरिवारका सबै सदस्य नर्भिकमा

पूर्व मुमा बडामहारानी रत्न राज्यलक्ष्मीदेवी शाह शारीरिक अस्वस्थताका कारण अस्पताल भर्ना भएकी छिन्। नर्भिक अस्पतालमा रत्नलाई बिहीबार विहान भर्ना गरिएको हो।
आन्द्रामा समस्या देखिएपछि उनलाई भर्ना गरिएको अस्पताल स्रोतले जनाएको छ। नर्भिक अस्पतालमा रत्नलाई बेडमा राखेर उपचार थालिएको नर्भिकले जनाएको छ।
‘आन्द्रामा केही समस्या आएपछि उहाँलाई भर्ना गरिएको हो,’ नर्भिक स्रोतले भन्यो। रत्नको स्वास्थ्य अवस्था सामान्य रहेको पूर्वराजा ज्ञानेन्द्रका स्वकीय सचिव फणिराज पाठकले सेतोपाटीलाई बताए।
डा. मधु घिमिरेले रत्नको स्वास्थ्य परीक्षण गरिरहेका छन्। तत्कालका लागि इन्डोस्कोपी, कोलोनोस्कोपी गर्नुपर्ने भएपछि उक्त उपचार थालिएको नर्भिकले जनाएको छ।
नर्भिकमा पुर्याउँदा राजपरिवारका प्रायः सदस्य उपस्थित थिए। पूर्वराजा ज्ञानेन्द्र, रानी कोमल, पूर्व युवराज्ञी हिमानीलगायतले रत्नलाई लिएर गएका थिए। हिमानी रत्नको रेखदेखमा छिन्। पूर्वयुवराज पारस शाह पनि रत्नलाई भेट्न जाँदैछन्। राजपरिवारका प्राय: सबै सदस्य अहिले नर्भिकमा रहेको पाठकले जानकारी दिए।
setopati