नेपालमा रेल चलाउन चीनबाट आयो प्रस्ताव, ओलीको सपना पूरा हुने संकेत
काठमाडौं, २६ जेठ । प्रधानमन्त्री केपी शर्मा ओलीले नेपालमा रेल चलाउँछु भन्दा धेरैले हावामा उडाएका थिए ।
‘हावादारी गफ’ दिने भनेर आलोचना गरेका थिए तर, अब नेपालमा रेल गुड्ने दिन धेरै टाढा छैन भन्ने कुरालाई हालै चीनबाट आएको एउटा प्रस्तावले प्रमाणित गरिदिएको छ ।
चीन सरकारको स्वामित्वमा रहेको चाइना रेल्वे कन्स्ट्रक्सन कर्पाेरेशन लिमिटेडले काठमाडौं–रसुवागढी रेलमार्गको सम्भाव्यता अध्ययनका लागि अनुमति माग्दै सोमबार काठमाडौंस्थित नेपाल रेल्वे विभागमा औपचारिकरुपमा निवेदन दर्ता गराएको छ ।
आगामी आर्थिक वर्षका लागि सरकारले भर्खरै ल्याएको बजेटमा दुई वर्षभित्र रसुवागढी–काठमाडौं–पोखरा हुँदै लुम्बिनीसम्मको रेलमार्गको परियोजना प्रतिवेदन तयार गरिसक्ने घोषणा गरेसँगै चिनियाँ कम्पनीले सम्भाव्यताको विस्तृत अध्ययनका लागि अनुमति माग्दै निवदेन दिएको चीनको सरकारी समाचार संस्था सिन्ह्वाले जनाएको छ ।
समाचारमा नेपाल रेल्वे विभागका कार्यकारी निर्देशक अनन्त आचार्यले सिन्ह्वालाई सम्भाव्यता अध्ययनका लागि चिनियाँ सरकारी कम्पनीले निवेदन दर्ता गराएको जानकारी दिएका छन् ।
गान्सु प्रान्तको लान्झोउबाट तिब्बतको दक्षिण पश्चिमी सहर सिगात्सेसम्म आइपुगेको चिनियाँ रेललाई चीनले सन् २०२० सम्म नेपालसँग जोडिएको केरुङसम्म विस्तारका लागि धमाधम काम अगाडि बढाइरहेको छ ।
केरुङबाट रसुवागढी पुग्न २७ किलोमिटर लाग्छ भने काठमाडौं ११२ किलोमिटर दुरीमा छ । केरुङबाट पोखरा हुँदै लुम्बिनीसम्म रेल गुडाउन ३०० किलोमिटर रेलमार्ग विस्तार गर्नुपर्ने हुन्छ ।
प्रधानमन्त्री केपी शर्मा ओलीको भ्रमणका क्रममा चीनले नेपालमा रेल विस्तारका लागि सहयोग गर्ने प्रतिबद्धता जनाएको थियो ।
चिनियाँ कम्पनीले अनुमति मागेसँगै रेलमार्ग निर्माणको अघि बढ्ने र प्रधानमन्त्रीको सपना पूरा हुने विज्ञहरु बताउँछन् ।
dainiknepal
