कांग्रेस नेता कोइरालालाई मन्त्रीको गाडीले सिंहदरबारभित्रै किच्यो, अवस्था गम्भीर

मन्त्री मञ्जुकुमारी चौधरी गाडीसहित
काठमाडौं, ३१ जेठ । सहरी विकास राज्यमन्त्री मञ्जुकुमारी चौधरीको झण्डावाल गाडीले ठक्कर दिँदा नेपाली कांग्रेसका एक जना नेता गम्भीर घाइते भएका छन् ।
सिंहदरबारभित्रै सहरी विकास मन्त्रालयको मुल गेट नजिकै मन्त्रीको झण्डावाल गाडीले आज बिहान करीव १० बजे कांग्रेस नेता प्रदीप कोइरालालाई ठक्कर दिएको हो । मन्त्रीको गाडीको ठक्करबाट कोइराला गम्भीर घाइते भएका छन् । उनको माइतीघरस्थित न्यूरो अस्पतालमा उपचार भइरहेको आफन्तले जनाएका छन् ।
‘मन्त्रीको कालो गाडी अनियन्त्रित रुपमा हुँइकिएर आएको थियो’, प्रत्यक्षदर्शी एक कर्मचारीले भने, ‘कांग्रेस नेता प्रदीप कोइरालालाई ठक्कर दिइहाल्यो । खुट्टा भाँच्चिएको छ । शल्यक्रिया गर्नुपर्ने भएको छ ।’
नेपाली कांग्रेस काभ्रेका प्रभावशाली नेता कोइराला कामको शिलशिलामा सिंहदरबार गएका थिए ।
दुर्घटनाका बेला मन्त्री चौधरी भने गाडीमा थिइनन् । हुइक्किएर आएको गाडी अनियन्त्रित भइ दुर्घटना भएको प्रत्यक्षदर्शीले बताएका छन् ।
dainiknepal