यस वर्षको एसएलसीको परीक्षा फल आज सार्वजनिक हुदै, अन्तराष्ट्रियस्तरको मापदण्डका आधारमा नतिजा ग्रेडिङ प्रणालीबाट

यस वर्षको एसएलसी परीक्षाको परीक्षाफल आज सार्वजनिक हुने भएको छ । यस वर्षको नतिजामा कोही फेल नहुने भएका छन् । यस वर्षदेखि अन्तराष्ट्रिय स्तरको मापदण्डका आधारमा नतिजा ग्रेडिङ प्रणालीबाट गर्न लागेको हो ।

परीक्षा नियन्त्रण कार्यालय भक्तपुरका अनुसार एसएलसी शुरु भएको ८२ वर्षपछि पहिलो पटक कोही फेल नहुनेगरी परीक्षाको नतिजा सार्वजनिक गर्न लागेको हो । यस्तै ग्रेस माक्र्स दिने ब्यवस्था पनि यसै वर्षदेखि हटाउने भएको छ । यो वर्षदेखि एसएलसी परीक्षाको परीक्षाफल पत्रिकामा प्रकाशन गरिने छैन । ६ लाख सहभागी सबै पास हुने हुँदा सबैको सिम्बोल नम्बर पत्रिकामा छाप्न गाह्रो हुने भएकाले वेबसाइट तथा एसएमएसमार्फत् परीक्षा नियन्त्रक कार्यालय रिजल्ट प्रकाशन गर्न लागेको हो ।
परीक्षा नियन्त्रण कार्यलयका अनुसार एसएलसीको नतिजा अक्षरांकन पद्धतिमा प्रकाशित हुने भएकाले विद्यार्थीहरु उत्तीर्ण वा अनुत्तीर्ण हुँदैनन् । त्यसैले ग्रेस माक्र्सको व्यवस्था हटाइएको हो । यसअघि नतिजा प्रकाशनको समयमा एसएलसी परीक्षा समिति बोर्ड बैठकले निर्णय गरी बढीमा दुई विषयमा ५ नम्बर ग्रेस माक्र्स थपेर विद्यार्थीलाई पास गराउँदै आएको थियो । आज प्रकाशन हुने नतिजामा ७ तहको अक्षरांकन प्रणालीबाट हुनेछ । त्यसका लागि टर्निङ पोइन्ट २० देखि ९० प्रतिशतसम्म हुन्छ । गत वर्षसम्म एसएलसीको उत्तीर्ण प्वाइन्ट ३२ थियो । यस्तै बढीमा दुई विषयमा डि र ई प्राप्त गर्ने परीक्षार्थीले सोही वर्ष ग्रेड वृद्धिको लागि ’ग्रेड वृद्धि’ परीक्षा अर्थात मौका परीक्षा दिन सक्नेछन् । विद्यार्थीले एसएलसीको नतिजापछि प्राप्त गरेको एसएलसी ग्रेड सिटमा बढीमा दुई विषयमा डि र ई अक्षरांकन छ भने उसले एक पटकलाई मौकाको रुपमा ग्रेड बृद्धि गर्न ग्रेडबृद्धि परीक्षा दिन सक्ने ब्यवस्था पनिकाले गरेको हो । यो वर्षको एसएसली परीक्षामा कूल ६ लाख १५ हजार ५ सय ५३ जना सहभागी छन् ।
news24nepaltv