सत्ता परिवर्तनको खेलमा लागेका दल नै संविधान कार्यान्वयनमा बाधकः उपप्रम थापा

हेटौँडा, २५ जेठ । उपप्रधानमन्त्री एवम् राप्रपा नेपाल अध्यक्ष कमल थापाले संविधान जारी गर्ने प्रमुख दल नै अहिले सत्ता परिवर्तन गर्ने खेलमा लागेकाले संविधान कार्यान्वयनमा बाधक देखिएको बताउनुभएको छ ।
अध्यक्ष थापाले आज हेटौँडामा राप्रपा नेपाल मकवानपुरको तेस्रो जिल्ला अधिवेशनको उद्घाटन गर्दै अहिले सत्ता हेरफेरभन्दा पनि संविधान कार्यान्वयन गर्न सबै दलले ध्यान दिनुपर्ने बताउनुभयो ।
सरकार परिवर्तनमा कम्मर कसेर लागेको प्रतिपक्षी दल नेपाली कांग्रेसतर्फ संकेत गर्दै उहाँले प्रमुख दलहरुले आपसी विवादलाई त्यागेर जनताको आर्थिक स्तर वृद्धि गर्न संविधान कार्यान्वयन र स्थायित्वको एकजुट हुनु पर्दछ भन्नुभयो ।
अध्यक्ष थापाले विगत १८ वर्षदेखि स्थानीय निकायको निर्वाचन नहुँदा विकास निर्माणका काम हुन नसकेको यथार्थलाई ध्यानमा राखेर स्थानीय निकायको निर्वाचन गर्न प्रमुख दल विभाजित हुन नहुने बताउनुभयो ।
सो अवसरमा केन्द्रीय सदस्यत्रय दीपकबहादुर सिंह, मधु अधिकारी र राजाराम बर्तौला तथा सांसद गणेश थापाले स्थानीय निकायको चुनाव गर्नुपर्ने बताउनुभयो । स्थानीय हुप्राचौरबाट र्याली सुरु भई नगर परिक्रमा गर्दै पल्पसा रोडसम्म पुगेको थियो ।
अध्यक्ष थापाले विभिन्न पार्टी परित्याग गरी राप्रपा नेपालमा प्रवेश गरेका नव प्रवेशीलाई टीका र माला लगाई स्वागत गर्नुभएको थियो । दुई दिनसम्म चल्ने अधिवेशनले नयाँ नेतृत्व चयन गर्नेछ । रासस
dainiknepal