प्रधानमन्त्री र अर्थ मन्त्रीले नीतिगत भ्रष्टाचार गरेको खुलासा, ‘चिटिङ’को भण्डाफोर गर्ने

काठमाडौं, १६ जेठ । दोस्रो ठूलो सत्तारुढ दल नेकपा (माओवादी केन्द्र)ले सरकारले सार्वजनिक गरेको आर्थिक वर्ष २०७३/७४ को बजेटमा प्रधानमन्त्री र अर्थमन्त्रीले चिटिङ गरेर आ–आफ्नो गृह जिल्लामा धेरै विकास योजना पारेर नीतिगत भ्रष्टाचार गरेको आरोप लगाएको छ ।
सिंहदरबारमा आज बसेको संसदीय दलको बैठकमा अध्यक्ष पुष्पकमल दाहालले प्रधानमन्त्री केपी ओली र अर्थमन्त्री विष्णु पौडेलले आ–आफ्नो गृह जिल्लामा धेरै विकासका कार्यक्रम राखेर नीतिगत भ्रष्टाचार गरेको आरोप लगाउनुभएको हो ।
‘प्रधानमन्त्री र अर्थमन्त्रीले बजेटमा नीतिगत भ्रष्टाचार गरेका छन्’, अध्यक्ष दाहालको भनाइ उदृत गर्दै स्रोतले भन्यो, ‘सोमबारदेखि सुरू हुने बजेटको छलफलमा एमालेले गरेको चिटिङको भण्डाफोर गर्नुपर्छ भनेर निर्देशन दिनुभएको छ ।’
सरकारले ल्याएको बजेटमा अधिकांश कार्यक्रम र योजनाहरू माओवादी सरकारका पालामा सुरू गरेका कार्यक्रमहरूकै निरन्तरता रहेको बताउनुभएका दाहालले भन्नुभयो, ‘बजेटमा धेरै नयाँ कुरा छैनन्, केलाएर हेर्ने हो भने सबै कुरा माओवादीका पालामा आएका कार्यक्रम छन् ।’
अध्यक्ष दाहालले बजेटका छलफलमा एमालेले सत्तारुढ दलहरूलाई पाखा लगाएको विषयमा पनि सदनमा जानकारी गराउन दिर्नेशन दिनुभएको छ ।
माओवादी केन्द्रले प्रधानमन्त्री ओलीको गृह जिल्ला झापा र अर्थमन्त्री पौडेलको गृह जिल्ला रुपन्देहीमा अन्य जिल्लाको तुलनामा धेरै विकासका कार्यक्रम राखेको आरोप लगाएको छ ।
माओवादी केन्द्रका सांसद अमनलाल मोदीले कृषिमा आएका कार्यक्रम, कर्मचारीको तलव वृद्धि, तीन वटा अन्तराष्ट्रिय एयरपोर्ट बनाउने विषय सबै कार्यक्रम अत्यन्तै राम्रा रहेको बताए ।
‘बजेट समग्रमा राम्रो छ’, सांसद मोदीले भने, ‘लडाकुलाई दिने भनिएको पाँच लाख रकमका विषयमा हामीलाई मान्य छैन । पूरा दश लाख दिनुपर्छ । संसदमा जोडदार कुरा राख्ने छौँ ।’
माओवादी केन्द्रको संसदीय दलको बैठकमा एमालेले सत्तारुढ दलहरू विरुद्ध देखाएको क्रियाकलापको विरोध भएको स्रोतले जनाएको छ ।
dainiknepal