उत्तर कोरियाली राजदूतमार्फत किमलाई प्रचण्डको बधाई
१६ जेठ
काठमाडौं – नेपालका लागि प्रजातान्त्रिक जनगणतन्त्र कोरिया उत्तर कोरियाका राजदूत किम योङ हक र नेकपा माओवादी केन्द्रका अध्यक्ष प्रचण्डबीच आइतबार बिहान भेटवार्ता भएको छ । भेटमा अध्यक्ष प्रचण्डले राजदूत हक मार्फत भर्खरै सम्पन्न कोरियाली श्रमिक पार्टीको सातौं राष्ट्रिय काँग्रेसबाट निर्वाचित अध्यक्ष तथा जनसेनाका सर्वोच्च कमाण्डर किम जोङ उनलाई बधाई तथा शुभकामना दिएका थिए ।
प्रचण्डले नेपालमा बामपन्थी बाहुल्य रहेको सरकार भएको र आर्थिक विकास र जनताको पक्षमा काम गरिरहेको बताए । उनले गत सालको विनासकारी भूकम्प र संविधान निर्माण पछिको नाकाबन्दीले नेपाली जनताले निकै ठूलो दुःख पाएको बताउँदै राष्ट्रले ठूलो आर्थिक क्षति ब्यहोर्नु परेको जानकारी दिए । प्रचण्डले भने, ‘अहिले हामीहरु भूकम्पले ध्वस्त संरचनाहरुको पुनर्निर्माण र आर्थिक विकासमा केन्द्रित छौं ।’
उक्त भेटवार्तामा राजदूत हकले नेपाल र कोरिया मिल्दा जुल्दा देश भएको बताउँदै दुई देशका धेरै विशषताहरु मिल्दा जुल्दा भएको धारणा राखे । उनले भने, ‘साम्राज्यवादीको नाकाबन्दी भए तापनि किम जोङ उन र उहाँको नेतृत्वमा आम जनता एकतावद्ध छ र हामी त्यसको सामना गर्न सक्छौं ।’ उनले राजनैतिक र सैनिक दुबै हिसावले आफूहरु शक्तिशाली रहेको पनि बताए ।
उनँले कोरियाली श्रमिक पार्टीका अध्यक्ष तथा जनसेनाका सर्वोच्च कमाण्डरले अध्यक्ष प्रचण्डलाई अभिवादन पठाउनु भएको पनि जानकारी दिए ।
ratopati
