असार १६ मा यसरी काठमाडौंमै हुनेभयो नेपाल–भारत सिधा सम्वाद

आइतबार, १६ जेठ
प्रबुद्ध समुहको पहिलो संयुक्त बैठक असार असार १६ र १७ गते
काठमाडौ । नेपाल र भारत बीच भएका सन्धी सम्झौताहरु पुनरावलोकनकोलागि सुझाव दिन गठन गरिएको प्रबुद्ध ब्यक्ति समुहको पहिलो संयुक्त बैठक असार असार १६ र १७ गते काठमाडौमा बस्ने भएकोछ ।
नेपालले सन् १९५० को नेपाल भारत मैत्री सन्धीसहित असमान सन्धी सम्झौता पुनरावलोकन र खारेजीको माग लामो समयदेखि गरिरहेपछि प्रधानमन्त्री केपी शर्मा ओलीको भारत भ्रमण अघि दुबै देशबाट समूह गठन गरिएको थियो ।
प्रबुद्ध समूहमा नेपालतर्फबाट डा. थापाको संयोजकत्वमा सूर्यनाथ उपाध्याय, निलाम्बर आचार्य र राजन भट्टराई सदस्य छन् । भारत तर्फबाट भारतीय जनता पार्टीका वरिष्ठ नेता भगतसिंह कोसियारीको संयोजकत्वमा महेन्द्र पी लामा, बीसी उप्रेती र पूर्वराजदूत जयन्त प्रसाद सदस्य छन् ।
समूहको बैठक बस्न नसक्दा यसको औचित्यमाथि नै प्रश्न उठिरहेको बेला उपप्रधान तथा परराष्ट्रमन्त्री कमल थापाले भारतीय समकक्षी सुष्मा स्वराजलाई पत्र नै लेखेर काठमाडौंमा पहिलो बैठक गर्न सहयोग गर्न आग्रह गरेपछि बैठकको बातावरण बनेको बताईएको छ ।
बैठकको मितिको विषयमा पनि दुबै पक्षवीच मतभेद रहँदै आएको थियो । भारतीय पक्षले असार १२ र १३ मा बैठक राख्न आग्रह गरेको र नेपालले जेठको अन्तिम साता प्रस्ताव गरेकोमा तेस्रो तिथी तय गरिएको हो ।
राष्ट्रपति विद्या भण्डारीको भारत भ्रमण स्थगन, दिल्लीबाट राजदूत दिपकुमार उपाध्यायलाई फिर्ता बोलाउने निर्णयपछि दुई देशको सम्बन्धलाई लिएर नकारात्मक टिप्पणी भईरहेको बेला बस्न लागेको बैठकले सकारात्मक सन्देश दिने विश्लेषण गरिएको छ ।
nepalsandesh