अन्ततः ओलीकै नेतृत्वमा राष्ट्रिय सरकार बनाउन प्रचण्ड तयार, सुर्खेतबाट गरे घोषणा

, २८ जेठ । नेकपा (माओवादी केन्द्र)का अध्यक्ष पुष्पकमल दाहाल प्रचण्डले अहिले सरकार गिराउनतर्फ नलागी सबै दल राष्ट्रिय सहमति बनाउनेतर्फ लाग्नुपर्ने बताउनुभएको छ ।
प्रदेश नं ६ को पार्टी एकता भेलाका लागि आज सुर्खेत आउनुभएका अध्यक्ष प्रचण्डले वीरेन्द्रनगरमा आयोजित पत्रकार सम्मेलनमा सहमतिका लागि आफ्नो दल हदैसम्म लचिलो भएको जानकारी दिँदै मुलुकको अहिलेको आवश्यकता भनेको राष्ट्रिय सहमति नै भएको स्पष्ट गर्नुभयो ।
उहाँले प्रधानमन्त्री केपी शर्मा ओलीकै नेतृत्वमा राष्ट्रिय सरकार बने आफूलाई मान्य हुने बताउनुभयो । ‘सहमति हुन्छ भने ओलीजीलाई मान्न तयार छौं । उहाँकै नेतृत्वमा राष्ट्रिय सरकार बन्छ भनेपनि आपत्ति छैन्’ उहाँले भन्नुभयो-‘संविधान कार्यान्वयन लगायत मुलुकमा देखिएका समस्या समाधान गर्न राष्ट्रिय सहमतिको विकल्प छैन् ।’
उहाँले संविधान कार्यान्वयन, मधेस तथा थारुको समस्या समाधान, पुनःनिर्माण र विकास गर्न प्रमुख दलबीच राष्ट्रिय सहमतिको आवश्यकता रहेको उल्लेख गर्नुभयो ।
अबको केही दिनभित्र मधेस समस्या समाधान हुने जिकिर गर्दै उहाँले मधेसवादी दलका नेताहरू पनि अब सहमतिको अवस्थामा आएकाले मधेस समस्या समाधान गर्न धेरै समय नलाग्ने बताउनुभयो ।
उहाँले एमाले र माओवादीबीच कुनै भद्र सहमति नभएको स्पष्ट पार्दै प्रमुख दल मिलेरै संविधान कार्यान्वयन, स्थानीय निर्वाचन र मधेस समस्या समाधान गर्नुपर्नेमा जोड दिनुभयो ।
dainiknepal