नयाँ शक्ति पार्टी घोषणामा प्रचण्ड नजाने
२०७३ जेष्ठ ३० आईतवार
प्रधानमन्त्री ओली ३ बजे उपस्थित हुने
काठमाडौँ: पूर्वप्रधानमन्त्री बाबुराम भट्टराई नेतृत्वको नयाँ शक्ति नेपालको पार्टी घोषणा कार्यक्रममा नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ नजाने भएका छन् ।
प्रचण्ड अध्यक्ष भएको तत्कालिन एकीकृत माओवादीबाट साधारण सदस्य समेत नरहने गरी गत वर्ष असोज ९ गते बाबुरामले पार्टी परित्याग गरेका थिए । पार्टी परित्याग गरेसँगै बाबुरामले सांसद पद समेत परित्याग गरेर नयाँ शक्ति निर्माण गर्ने घोषणा गरेका थिए ।
सोही घोषणा अनुसार बाबुरामले आइतबार दशरथ रंगशालामा तामझामका साथ नयाँ शक्ति नेपाल पार्टी घोषणा गर्दैछन् । घोषणा कार्यक्रममा भट्टराईले प्रधानमन्त्री एवम् एमाले अध्यक्ष केपी शर्मा ओली, प्रमुख प्रतिपक्षी दल नेपाली कांग्रेसका सभापति शेरबहादुर देउवा, केन्द्रका अध्यक्ष प्रचण्ड लगायत सबै पार्टीका प्रमुख नेतालाई निमन्त्रणा गरेका छन् ।
नयाँ शक्तिको पार्टी घोषणामा उपस्थित नेता, कार्यकर्ता र सर्वसाधारण । तस्बिरः नयाँ शक्ति नेपाल
नयाँ शक्ति घोषणामा अन्य नेता जाने बताइएको भए पनि प्रचण्ड नजाने भएका छन् । प्रचण्डको निजी सचिवालयका अनुसार उनी आइतबार दिनभर उपत्यका बाहिर रहने छन् ।
प्रचण्डका सहयोगी जोगबहादुर महराले अन्नपूर्ण अनलाइनसँग भने, ‘उहाँ बर्दियामा हुनुहुन्छ । आज दिनभर पार्टीकै कार्यक्रममा व्यस्त हुने कार्यतालिका छ ।’
आइतबार बर्दियाको सूर्यपटुवामा निर्माण भएको सहिद देवप्रसाद चौधरीको शालिक अनावरण गरेर प्रचण्ड दिउँसो ३ बजे नेपालगञ्जमा आयोजित अगुवा कार्यकर्ता भेला प्रशिक्षणमा सहभागी हुनेछन् ।
प्रधानमन्त्री ओली ३ बजे उपस्थित हुने
प्रधानमन्त्री केपी शर्मा ओली नयाँ शक्ति घोषणा कार्यक्रममा उपस्थित हुने भएका छन् । प्रधानमन्त्रीका प्रेस संयोजक चेतन अधिकारीका अनुसार प्रधानमन्त्री ओली दिउँसो तीन ३० बजे नयाँ शक्ति पार्टी घोषणा सभामा उपस्थित हुने छन् ।
प्रधानमन्त्री ओलीले पार्टी घोषणा कार्यक्रममा उपस्थित भएर शुभकामना दिने कार्यक्रम रहेको नयाँ शक्तिले जनाएको छ । पार्टी घोषणालाई व्यवस्थित गर्न देवेन्द्र पौडेलको संयोजकत्वमा मूल व्यवस्थापन समितिसहित अन्य १४ उपसमिति सक्रिय छन् ।
नयाँ शक्तिले पार्टी घोषणा सभामा देशभित्र रहेका क्रियाशील राजनीतिक दल, व्यवस्थापिका संसद सदस्य, विभिन्न संघसंस्थाका प्रतिनिधि, नागरिक समाजका अगुवा, पेसागत संगठन तथा मिडिया संवद्ध संस्था र व्यक्तिलाई आमन्त्रण गरिएको छ ।
annapurnapost
