प्रधानमन्त्री ओलीलाई कुर्सी होइन, बेड चाहिएको छ – संघीय गठबन्धन

काठमाडौं, १४ जेठ । संघीय गठबन्धनले आज शुक्रबार भक्तपुरको मध्यपुर थिमीमा विशाल विरोध सभा प्रदर्शन गरेको छ ।
संघीय गठबन्धनका संयोजक एवं संघीय समाजवादी फोरम नेपालका अध्यक्ष उपेन्द्र यादवको नेतृत्वमा शंखधर साख्वा चोकमा निकाली र्याली सरकार विरुद्व नाराबाजी एवं प्रदर्शन गर्दै मध्यपुर ठिमी पुगेर विरोध सभामा परिणत भएको थियो ।
विरोध सभालाई गठबन्धनका प्रभावशाली शीर्ष नेताहरुले सम्बोधन गरे । संविधान पुनर्लेखनका लागि १४ दिनेदेखि राजधानी केन्द्रीत आन्दोलनमा होमिएको संघीय गठबन्धनले हिजो बिहिबार कलंकीमा विरोध सभा गरेको थियो । थिमीको विरोध सभामा पनि अन्य स्थान झैं स्थानीय व्यापक उपस्थिति रह्यो ।
जारी आन्दोलनलाई सार्थक निष्कर्षमा पुर्याउन अन्तिम युद्धका लागि काठमाडौंका रैथाने नेवार समुदाय उठ्न थालेको गठबन्धनको दाबी छ । स्थानीय नेवारको सहभागिता बिना काठमाडौंको शासकलाई झुकाउन नसकिने भन्दै गठबन्धनले आन्दोलनमा नेवारको सहभागिता दिनप्रतिदिन बढ्दै गएको दाबी गरेको हो ।
थिमीको विरोध सभालाई सम्बोधन गर्दै गठबन्धनका नेता राजेन्द्र श्रेष्ठले राज्यको विभेदकारी चरित्र विरुद्ध नेवार समुदाय उठ्न थालेको दाबी गरे । ‘इतिहास साक्षी छ, यहाँका रैथाने नेवारको सहभागिता बिना काठमाडौंको सत्ता र व्यवस्था कहिल्यै फेरिएन,’- श्रेष्ठले भने, ‘मधेश, लिम्बूवान, मगरात, खसान, खम्बूवान सबै उठिसके, अब अन्तिम युद्धका लागि नेवार समुदाय उठ्दैछ ।’
संघीय समाजवादी फोरम नेपालका सहअध्यक्ष समेत रहेका गठबन्धन नेता श्रेष्ठले प्रधानमन्त्री केपी ओलीलाई सिंहदरबारको कुर्सी भन्दा घरको बेडमा विश्राम चाहिएको सुझाव दिएका छन् । ‘एक घन्टा काम गर्दा चार घन्टा विश्राम गर्ने प्रधानमन्त्रीले कुर्सीको मोह त्यागेर घरमा विश्राम गर्न गए हुन्छ’- श्रेष्ठले सुझाए ।
त्यस्तै, गठबन्धनका अर्को नेता अर्जुन थापाले घरेलु समस्या र विदेशी कूटनीतिको व्यवस्थापन दुवैमा प्रधानमन्त्री ओली विफल भएको टिप्पणी गरेका छन् । थिमीको विरोध सभालाई सम्बोधन गर्दै संघीय समाजवादी फोरम नेपालको विदेश विभाग प्रमुख समेत रहेका नेता थापाले भने,– ‘देशमा मात्र होइन, विदेशमा समेत नेपालको इज्जत र प्रतिष्ठालाई ओलीले बिगारिसके । अहिलेसम्मकै सरकारको यो कूटनीतिक विफलता हो ।’ अधिकार प्राप्तिका लागि सारा देश सडकमा आन्दोलन गरिरहँदा पनि कानमा तेल हालेर सुत्ने प्रधानमन्त्री ओलीलाई एक क्षण पनि सत्तामा बस्ने नैतिक आधार नरहेको नेता थापाले टिप्पणी गरे ।
थिमीको विरोध सभामा बोल्ने गठबन्धनका नेताहरुले २६ सुत्रिय माग सम्बोधन नहुँदासम्म आन्दोलन नरोकिने सडकबाटै चेतावनी दिएका छन् । राजधानी केन्द्रीत दोस्रो चरणको आन्दोलन अन्तर्गत गठबन्धनले भोलि शनिबार काठमाडौंको बसन्तपुरमा विरोध गर्नेछ । सबै जातजाति, वर्ग, समुदाय सम्मिलित विविधता युक्त गणतन्त्र नेपालको प्रष्ट तस्वीर बोकेको गठबन्धनले संघीयता, पहिचान र संविधान पुनर्लेखनको सवालमा कलंकी तताउन सफल भयो ।
सिंहदरबार र वालुवाटार घेराऊ सफल पारेर राजधानी तताइरहेको गठबन्धनमा मधेशी, आदिवासी जनजाति, खस, थारु, दलित, महिला, मगरात, खम्बूवान, लिम्बूवान, नेवाः, शेर्पा लगायतका आबद्ध छन् ।
dainiknepal