आपत्कालीन केन्द्रबाट बाढीपीडितलाई सहयोग गर्छौं : गृहमन्त्री बस्नेत

मंगलबार, ११ जेठ
कालीकोट। गृहमन्त्री शक्तिबहादुर बस्नेतले जिल्लास्तरमा आपत्कालीन केन्द्रको स्थापना गरी विपद्मा परेका बाढीपीडितको उद्धार गर्न सरकार तयार रहेको बताउनुभएको छ ।
कालीकोटका बाढीपीडितको अवस्था बुझ्न आज बिहान सदरमुकाम मान्म पुग्नुभएका मन्त्री बस्नेतले आपत्कालीन केन्द्रको स्थापनासँगै आपत्कालीन सामग्रीको समेत व्यवस्था गर्ने सरकारले निर्णय गरेको बताउनुभयो ।
गृहमन्त्री बस्नेतले ठूलो आशा गरेका कालीकोटका बाढीपीडितलाई सरकारका तर्फबाट रु पाँच हजारको राहतसँगै दुई बन्डल जस्तापाता उपलब्ध गराउने बताउनुभयो ।
हेलिकप्टरबाट सदरमुकाम मान्म पुग्नुभएका गृहमन्त्री बस्नेतले बाँके, बर्दिया, सुर्खेत लगायतका मध्य तथा सुदूरपश्चिमका जिल्लामा गत वर्षको बाढीले पु¥याएको क्षतिपछि सरकारले बनाएको नीति कालीकोटका लागि लागू गर्ने आश्वासन दिनुभयो ।
गृहमन्त्री बस्नेतले गेजबजारमा जेठ ६ गते राति आएको बाढीपहिरोको विपद्मा परी ज्यान गुमाएका प्रति श्रद्धाञ्जलि व्यक्त गर्दै शोकसन्तप्त परिवारजनमा संवेदना व्यक्त गर्नुभयो । उहाँले विपद्पछि उद्धार कार्यमा खटिने प्रहरी, सेना, राजनीतिक दल, स्थानीय प्रशासनलगायतका सबै सामाजिक सङ्घसंस्थालाई धन्यवाद दिनुभयो ।
उहाँले नेपालीको दुःख पर्दा होस् वा सुख पर्दा होस् एकअर्कालाई सहयोग गर्ने नेपाली परम्परा बचाई राख्नुपर्नेमा जोड दिनुभयो । गृहमन्त्री बस्नेतले सकारले तत्काल आव २०७३÷७४ को बजेट ल्याउन लागिरहेको र कर्णालीजस्ता विकट क्षेत्रलाई विशेष प्राथमिकतामा राख्ने पनि बताउनुभयो ।
कर्णालीको विकासका लागि सरकार जिम्मेवार रहेको भन्दै उहाँले नयाँ संविधानले सबै नेपालीको हकअधिकारको सुनिश्चिता गरेको दाबी गर्नुभयो । गृहमन्त्री बस्नेतले राजनीतिक दलले नयाँ संविधान कार्यान्वयनका लागि जोड दिएमा बेरोजगार युवा खाडी मुलुक जानु नपर्ने बताउनुभयो ।
गृहमन्त्री बस्नेतले रेडक्रसको जिल्ला शाखाले उपलब्ध गराएको गैरखाद्य राहत सामग्री र जिल्ला प्रसारण कार्यालयले उपलब्ध गराएको एकजना मृतकको ४० हजार मृतक राहत पीडित परिवारका सदस्यलाई हस्तान्तरणसमेत गर्नुभएको छ । जेठ ६ गतेको बाढीमा परी लालीघाटमा अहिलेसम्म पाँचको ज्यान गएको छ भने दुई जना अझै बेपत्ता रहेका छन् ।
यस्तै, जिल्ला प्रशासन कार्यालयका अनुसार बाढी पहिरोले करिब तीन करोड बराबरको सम्पत्तिको क्षति भएको बताएको छ । वैशाख ३१ गते दैखोलामा आएको बाढीेले एकको ज्यान जानुका साथै नौ जनाको घर तथा पसलमा क्षति पुगेको गृहमन्त्री बस्नेतलाई जानकारी गराइएको छ । रासस
nepalsandesh