सिरियामा भएका भीषण आतङ्कवादी आक्रमणमा १४८ को मृत्यु

बुधबार, १२ जेठ

एजेन्सी । सिरियाली राष्ट्रपति बसर अल असदका समर्थक एवम् सरकारको हालसम्मको बलियो उपस्थिति मानिएका दुई छुट्टाछुट्टै स्थानमा सोमबार भएको हिंसात्मक आक्रमणमा परी कम्तीमा पनि १४८ जनाकोे मृत्यु भएको छ ।
आतङ्कवादी संस्था इस्लामिक स्टेट (आईएस) द्वारा गराइएका ती विस्फोटमा परी कम्तिमा पनि १४८ जनाको मृत्यु भएको अन्तराष्टिय सञ्चारमाध्यमले जनाएको छ । विष्पोटबाट सयौँको सङ्ख्यामा घाइते भएका छन् ।
सिरियाका उत्तरपश्चिमी क्षेत्रका विभिन्न स्थानमा यो आक्रमणको तारो बनाइएको छ । त्यस क्रममा उनीहरुले बसपार्क, अस्पताल, विभिन्न स्थानीय नागरिकका सेवा केन्द्रहरुका साथै विभिन्न सरकारी अड्डालाई तारो बनाएका थिए ।
सिरियाको उत्तरपश्चिमी नगर जाबेहमा यस्तो हमला भएको थियो । यो हमला मुख्य हमला थियो । जसका कारण सो क्षेत्रमा ठूलो क्षति पनि पुगेको छ ।
उक्त सहर सिरियामा जारी रहेको पाँच वर्षे युद्धका क्रममा पनि खासै प्रभावित थिएन । यस नगरलाई सरकारले आफ्नो सुरक्षित स्थल वा गढका रुपमा लिइआएको थियो ।
सोमबार विस्फोटमा परी जावलेह सहरमा मात्र ७५ जनाको मृत्यु भएको र यसबाट अझ दक्षिणमा अवस्थित टारटस सहरमा थप मानिस मारिएका छन् ।सिरियाली मानवअधिकारवादी संस्थाले मङ्गलबार बिहान प्राप्त एक समाचारमा सो नगरमा मारिएका नागरिकको सङ्ख्या १४८ पुगेको पुष्टि भएको जनाएको छ ।। ती विस्फोटको जिम्मेवारी उक्त आतङ्कवादी संस्थाले नै लिएको छ ।
सिरियाली हिंसाको अध्ययन गरिरहेको मानवअधिकारवादी संस्था सिरियन अब्जरभेटरीका प्रमुख रमि अब्देल रहमानले सिरियामा सन् २०११ पछि भएका केही ठूला हमलामध्ये सोमवार भएका यी आक्रमण पनि शक्तिशाली भएको बताए ।
आईएस समूहले घटनाको जिम्मेवारी आफ्नो समाचार संस्था अमाक न्यूज एजेन्सीमार्फत लिएको छ । दुवै सहर सिरियाली सरकारको पकडमा रहेका इलाका भएको यसअघि जनाइएको थियो । सिरियामा जारी रहेको युद्धविरामको अवस्थामा पनि असर पर्ने हो कि भन्ने चिन्ता छाएको बताइएको छ ।
सिरियाली राष्ट्रपति बसार अल असादको परिवार जावेलेहबाट २५ किलोमिटर पूर्व कार्दहबाट दमास्कस आएको हो । उक्त इलाकामा मुख्यतया अलावित नामक सिया समुदायको बसोबास रहँदै आएको छ ।
सिरियाको तटीय क्षेत्रमा आईएसको उपस्थिति नभएको मानिन्छ तर यसको जिहादी विरोधी समूह र अलकायदाको स्थानीय समूह अल नुस्रा फ्रन्टको प्रभुत्व रहेको छ ।तर सोमबारको सो आक्रमणहरुले सिरियामा आइएसको प्रभाव बढ्दै गएको हुनसक्ने विषयमा पनि विभिन्न समाचारहरु आएका छन् ।
उता सिरियामा पछिल्लो समयमा सरकारसँग शान्तिवार्ताका लागि गरिएको युद्धविरामको असर पर्ने हो कि भन्ने बारेमा पनि चिन्ता व्यक्त भएको छ ।सिरियामा गएका केही समययतादेखि युद्धविराम भएको छ । त्यसको पहल रसिया र अमेरिकाले गरिरहेका छन् ।
सोमबारको हमलाका कारण सिरियामा थप हिंसा मच्चिन सक्ने र यसले गर्दा आगामी दिनमा युद्धविरामको अवस्था भाँडिन सक्ने त्रास छाएको पनि बताइएको छ ।
सिरियामा गएको करिब पाँच वर्षदेखि हिंसा छाएको छ । यस हिंसामा परी दशौँ हजार नागरिक मारिएका छन् ।अमेरिकी र रसियाली पहलमा पछिल्लो समयमा सिरियामा युद्धविराम सुरु भएको छ । त्यस युद्धविरामको अनुगमन संयुक्त राष्ट्रसंघले गरिरहेको छ ।
र त्यस बमोजिम वार्ताको प्रक्रिया भने अघि बढ्न सकिरहेको छैन । वार्ताका लागि सरकारी पक्ष तयार छ तर विपक्षीहरुले सिरियाली राष्ट्रपति असदले सत्ता छोड्नुपर्ने मुख्य माग राख्दै आएका छन् ।
nepalsandesh