फेसबुकमा सुन्दर युवतीलाई साथी बनाउँदा…
काठमाडौं : फेसबुकको प्रोफाईलमा राम्री युवती देख्नैवित्तिकै साथी बनाउँदै हुनुहुन्छ भने सोच्नुहोला । नत्र, भारत घर भई हाल महाबौद्धमा बस्ने रोशन गुप्ता जस्तै फस्नु होला । धापासी बस्ने विक्रम ज्ञवाली र केविन केसीले फेसबुकमा ‘सुवास्ना गौतम’ नामको नक्कली आइडी बनाएर गुप्ताबाट चार लाख १७ हजार रुपैंया ठगी गरेको प्रहरीले जनाएको छ ।
पीडित गुप्ता महानगरीय प्रहरी अपराध महाशाखामा पुगेर उजुरी दिएपछि प्रहरीले सुक्ष्म अनुसन्धान सुरु गरेको थियो ।
प्रहरीले अनुसन्धानका क्रममा महावौद्धमा कपडा पसल गरिबस्ने गुप्तालाई साथी बनाईसकेपछि नाटकीयरुपमा च्याट गरी ‘तिम्रो मायाले हाम्री बहिनीले हात काटी अस्पतालमा उपचार गराइरहेकी छिन्, उपचारको लागि ५५ हजार रुपैयाँ दिने भए देउ होइन भने पुलिस केश गरिदिन्छु’ भनेर धम्क्याएको फेला पार्यो ।
त्यतिमात्रै होइन ज्ञवाली र केसीले गुप्ताको पसलमा गई आफूहरु सुवास्नाको दाजु रहेको र उपचारको लागि पैसा नदिए जे पनि हुनसक्छ भन्दै धम्की समेत दिएको पीडित गुप्ताले प्रहरीलाई बताएका छन् । उनीहरुले पटकपटक गरी गुप्ताबाट चार लाख १७ हजार रुपैंया असुल गरेको जानकारी महाशाखाका प्रमुख एसएसपी सर्वेन्द्र खनालले दिए ।
महाशाखाका अनुसार चार लाख बढी रकम असुली गरेपछि पनि ज्ञवाली र केसीले थप दुई लाख रुपैंया मागेपछि गुप्ता प्रहरीको सरणमा पुगेका थिए । प्रहरीले ज्ञवाली र केसीलाई पैसा लिन बोलाएको जसरी नाटकीय ढंगबाट महाराजगंजस्थित भाटभटेनीबाट पक्राउ गरेको हो ।
ज्ञवाली र केसीले सुरुमा सविन पाण्डेको नाममा नक्कली फेसबुक आईडी खोलेको र पछि नाम परिवर्तन गरी सुवास गौतम र पछि ठगी गर्ने उद्देश्यले दुवै मिलेर सुवास्ना गौतम राखी ब्ल्याक मेलिक गर्ने गरेको प्रहरी अनुसन्धानबाट खुलेको छ ।
प्रहरीले उनीहरुबाट सामसुङ कम्पनीको ग्यालेक्सी ट्याव, दुइ थान मोबाईल, सुनको सिक्री र नगद दुई लाख ५३ हजार रुपैंया बरामद गरेको छ ।
अन्नपूर्ण पाेस्ट बाट
