भारतका कारण राष्ट्रियता खतरामाः सिंह

बुटवल, ११ जेठ । नेकपा मसालका महामन्त्री मोहनविक्रम सिंहले भारतका कारण मुलुकको राष्ट्रियता सबै भन्दा बढी खतरामा परेको बताउनुभएको छ ।
उहांले नेपालको तराईलाई टुक्राउन भारतले योजनावद्व षडयन्त्र गरेकाले मुलुकको राष्ट्रियता इतिहांस मै खतरामा परेको दावी गर्नुभयो ।
प्रगतिशील पत्रकार संघ नेपाल रुपन्देहीले मंगलबार बुटवलमा आयोजना गरेको पत्रकार सम्मेलनमा बोल्दै महामन्त्री सिंहले अंगे्रजपछि राष्ट्रियता सबैभन्दा बढी खतरामा रहेको बताउनुभयो ।
उहांले विश्युद्वताका अंग्रेज शासकबाट र अहिले छिमेकी राष्ट्र भारतका कारण नेपालको राष्ट्रियता र गणतन्त्र खतरामा परेको बताउनुभयो ।
नेपालको तराईलाई भारतमा गाभ्ने षडयन्त्रलाई असफल बनाउन राष्ट्रबादी शक्ति सचेत हुनुपर्ने बताउंदै उहांले हाम्रा राजनीतिक दलका नेताहरुको दलाली र सत्ता मोहको कमजोरीले भारत बलियो बनेको बताउनुभयो ।
दलका नेताहरु राष्ट्रबादी नभएकाले नेताहरुको कमजोरीको फाईदा लिएर भारतले नेपालको तराई र पानीमा आंखा लगाएका कारण राष्ट्रियता, धर्मनिरपेक्षता र गणतन्त्र खतरामा परेको नेता सिंहको तर्क छ ।
भारतले तराईलाई नेपालबाट अलग गराउन मधेसवादी दलहरुलाई प्रयोग गरेको उल्लेख गर्दै उहांले सुगौली सन्धि गरेर नेपालको केहि भाग भारतमा गाभेजस्तै अहिले भारतीय पक्ष अहिले तराई अलग गराउने गरी लागि परेको बताउनुभयो ।
उहांले मधेशवादी दलका नेताहरुलाई भारतले प्रयोग गरेर चलखेल गरेको चर्चा गर्दै मधेशवादी दलका नेता भारतको षडयन्त्रमा चलेपनि त्यहाँका जनता राष्ट्रवादी र देशभक्त भएको बताउनुभयो ।
उहांले गैर नेपालीलाई नेपाली नागरिकता दिने खुकुलो प्रावधान बनाई नेपालको संसदमा मधेशी दलको बहुमत पुर्याएर अन्ततः तराईलाई नेपालबाट अलग गर्न भारत लागि परेको बताउनुभयो ।
संसदमा बहुमत पुर्याउनका लागि मधेशबादी दलले जनसंख्याको आधारमा निर्वाचन क्षेत्र र नागरिकतामा समान अधिकारको कुरा उठाएको टिप्पणी गर्नुभयो ।
उहांले संविधान संशोधन नेपाली जनताको पक्षमा नरहेको बताउंदै संविधान पुनर्लेखन सम्भव नै नभएको बताउनुभयो ।
आमाको नामबाट नागरिकता दिनु महिला अधिकारको दृष्टिले ठिक हो, तर आमा वुबा मध्ये एकजना गैर नेपाली भएको खण्डमा आमा बुबा अनिवार्य हुुनुपर्ने नेता सिंहको तर्क छ ।
भारतीय सरकार जहिले पनि नेपाललाई आफु अनुकुल बनाउन चाहने भन्दै मोदी सरकार अझ बढी कडा रुपमा प्रस्तुत भएको बताउनुभयो । संविधान निर्माणमा काँग्रेस, एमाले र एमाओवादी सहितका दलहरु एकताबद्ध भई भारतको दबाब विपरित गएको उसको योजना असफल भएको सिंहले बताउनुभयो ।
उहांले चीनसंग सम्झौता गरेर भारतको दवावलाई अस्वीकार गरेर तुलनात्मक रुपमा वर्तमान सरकारले राम्रो काम गरेपनि नागरिकताको विषयमा खुकुलो प्रावधान ल्याएर सरकारले राष्ट्रियताको मुद्दामा अडिन नसकेको बताउनुभयो ।
सरकारले ल्याएको नागरिकता सम्बन्धी खुकुलो नीति तथा प्रावधानले गैर नेपालीले सहज रुपमा नेपाली नागरिकता पाउन सक्ने बताउनुभयो ।
नेपाली कम्युनिष्ट आन्दोलनका पाका नेताको रुपमा चिनिने कम्यूनिष्ट नेता मोहनविक्रम सिंहले माओवादी घटकहरुको एकतालाई सिद्धान्तहिन एकता भएको बताउनुभयो ।
आत्म सुरक्षाका लागि एकता गरिएको टिप्पणी गर्दै उहांले नीति सिद्वान्त एकता नभईकन भएको एकताले कम्युनिष्ट आन्दोलनमा अर्थ र महत्व नरहने बताउनुभयो ।
उहांले द्धन्द्धकालिन मुद्धाबाट बच्नका लागि माओवादीहरु एक ठाउंमा आएको बताउंदै माओवादी एकता निति र सिद्धान्तको आधारमा नभएको दावी गर्नुभयो ।
द्धन्द्धकालिन मुद्धा युद्धका बेलामा भएको फिर्ता हुनुपर्ने भएपनि निर्दोष सर्वसाधारणमाथि गरिएको अन्यायको छानबिन भई कारवाही हुनुपर्ने आफूहरुको मान्यता रहेको नेता सिंहको तर्क छ ।
dainiknepal