नेपालको जुट सामग्रीमा भारतले एण्टी डम्पिङ ड्युटी लगाउने,उद्योगहरु वन्द हुने अवस्थामा
भारत सरकारले नेपालबाट निर्यात हुने जुट सामग्रीमा एण्टी डम्पिङ ड्युटी लगाउने तयारी गरेको छ । भारतको यस्तो तयारीसंगै सुनसरी मोरङ औद्योगिक करिडोरका जुट उद्योगहरु बन्द हुने भएका छन् ।
एण्टी डम्पिङ ड्युटी लगाइएपछि नेपालबाट निर्यात हुने जुट सामग्रीहरुले थप कर व्यहोर्नु पर्ने मात्र नभई भारतीय बजारमा प्रतिष्पर्धा गर्न नसक्ने कारण बन्द हुने नेपाल जुट उद्योग संघले जनाएको छ । एकातिर कच्चा जुटको अत्यधिक मुल्य वृद्धि र अर्को तिर लोडसेडिङका कारण उत्पादन घटाउदै लगेका यस क्षेत्रका ११ वटा जुट उद्योगहरु मध्ये ७ वटा बन्द भईसकेका छन् ।
नेपालका जुट उद्योगहरुले निर्यात गरेको जुट सामग्री भारतको सरकारी तहमा बेच्न नपाउने नियमका कारण अहिले स्थानीय व्यापारीहरुलाई सस्तोमा बेच्नु परिरहेको र उचित मुल्य नपाएको नेपाल जुट उद्योग संघका अध्यक्ष राजकुमार गोल्छाले जानकारी दिनुभयो ।
कच्चा जुटको मुल्य अहिले सम्मकै सबैभन्दा बढी करिब १ लाख रुपैया प्रति मेट्रिक टन पुगेको छ । नयाँ जुट आउन अझै करिब ३ महिना लाग्ने बताइएको छ । यस क्षेत्रका जुट उद्योगहरुले भारत र बंगलादेशबाट वार्षिक करिब १ अरब ५० करोड रुपैयाँ बराबरको ६० हजार मेट्रिक टन कच्चा जुट आयात गरी तयारी जुट सामग्री भारतमा विक्री गर्दै आएका छन् ।
जुट उद्योगीहरुले एण्टी डम्पिङ ड्युटी नलगाउन नेपाल सरकारले भारत सरकारलाई पहल गरिदिनुपर्ने माग गरेका छन् ।news24nepaltv
