नेपाली सेनालाई रक्षामन्त्री रावलको सुरक्षाबारे निर्देशन

गाईघाट (उदयपुर), २१ जेठ । उपप्रधानमन्त्री तथा रक्षामन्त्री भीम रावलले आज उदयपुरको सदरमुकाम गाईघाटस्थित बोक्सेमा रहेको नेपाली सेनाको भवानी दल गण ब्यारेकको निरीक्षण भ्रमण गर्नुभएको छ ।
बिहान गाईघाट आइपुग्नुभएका रक्षामन्त्री रावलले भवानी दल गणको ब्यारेक क्षेत्रको जग्गा तथा कार्यालयको अवस्थाको निरीक्षण गर्नुभएको भवानी दल गणका गणपति सुमन खड्काले बताउनुभयो ।
निरीक्षणपछि मन्त्री रावलले सेनाका अधिकृतलाई सुरक्षाको बारेमा निर्देशनसमेत दिनुभएको थियो ।
नेकपा (एमाले) का उपाध्यक्षसमेत रहनुभएका रावलले आजै जिल्लाको सदरमुकाम गाईघाटस्थित (एमाले)का कार्यकर्तासँग पनि भेटघाट गर्नुभएको छ ।
कार्यकर्ता भेटघाटमा रावलले अब जिल्लाका कार्यकर्ताहरु पार्टीको गुट तथा उपगुटमा नलागेर सरकारले ल्याएको नीति तथा कार्यक्रम र बजेटको कार्यान्वयनमा लाग्नुपर्ने बताउनुभयो ।
उहाँले पार्टीका कार्यकर्ताहरु यो नेता वा त्यो नेता भनेर गुट उपगुटमा नलागी पार्टीको निर्देशनमा चल्नुपर्दछ भन्नुभयो ।
पार्टीभित्र गुट उपगुटमा नलागी सबै कार्यकर्ता एक हुने हो भने अब नेकपा (एमाले)ले आगामी निर्वाचनमा दुई तिहाइ मत ल्याएर एकमना सरकार गठन गर्न सक्ने उहाँको भनाइ थियो । रासस
dainiknepal